Cultura
LES NOTICIES, 25 de febreru 2007 15 MIGUEL BARRERO –«Tripulantes» naz como un homenaxe al fanzine Vinalia Trippers. ¿Qué importancia tuvo esa publicación na cultura (o contracultura) contemporánea? –DAVID GONZÁLEZ: Muncha, na mio opinión. Nella editaron textos. Nella editaron textos y ilustraciones munchos escritores y artistes gráficos qu’anguaño son verdaderos «cracks». Y amás ta’l fechu de que Vinalia atrevíase, por dicilo asina, a editar textos que n’otres revistes o fanzines nun teníen sitiu. Y tampoco hai qu’escaecer que falamos d’un fanzine multidisciplinar. Había cómic, ilustraciones, relatos... Un rasgu que tamién quiximos que tuviere esti llibru. –VICENTE MUÑOZ: Vinalia foi una plataforma d’interconexión de distintos creadores con diferentes inquietudes estétiques y un mediu d’expresión llibre pa delles voces consideraes hasta nun hai muncho lliteraria y políticamente incorrectes. Y un exemplu de cómo la cultura soterránea puede allumar tamién obres brillantes. –¿En qué momentu se planteen la edición d’un llibru colectivu? –D.G.: Más o menos a mediaos de 2004, xusto cuando tábemos promocionando «Golpes». Vicente falome de la idea y foi entós cuando empecipiamos a pedi-yos colaboraciones a distintos escritores, sobre too a los qu’escribíen de mou habitual en Vinalia o xugaron un papel importante na creación de la mesma, como Alfonso X. Rabanal, Silvia D. Chica o Toño Benavides. –V.M.: Si. Nesa dómina planteámonos facer dalgo más extenso y ambicioso, una antoloxía más amplia, y asina foi como nació «Tripulantes». –Nel volume hai autores procedentes de delles partes del Estáu. ¿Cuál foi’l criteriu a la hora de decidir cuáles debíen tar incluyíos o non? –D.G.: Siguiendo cola respuesta que te daba enantes, el criteriu foi’l d’alcontrar autores que vivieren toa aquella movida de los fanzines y que tuvieren el espíritu independiente del que Vinalia yera santu y seña. Depués tamién quiximos tener a autores que, anque nun s’alcuentren na nuestra onda lliteraria, por dicilo asina, tienen una calidá incuestionable, como pueden ser Ricardo Menéndez Salmón, Juan Planas Bennasar, Juan Francisco Ferré, Jorge Ordaz o José Ángel Barrueco, por citar namás dalgunos. –V.M.: L’únicu criteriu foi’l nuestru gustu personal, teniendo en cuenta los nuestros contactos y les influencies lliteraries recíproques. En «Tripulantes» tan representaes munches tendencies estétiques distintes y diferentes puntos de vista y criterios. Nun ye un llibru ciarráu, sinón un proyectu múltiple y colectivu. –Les antoloxíes (y «Tripulantes », de dalgún mou, ye una antoloxía) siempre creen controversies. ¿Cómo se foi desencolcando’l trabayu ente los dos coordinadores? –D.G.: Bono... Vicente y yo yá nos conocíemos, somos amigos dende qu’un bon día nos presentare Antonio Orihuela hai yá más d’una década... Los nuestros respectivos calteres compleméntense abondo. Hubo tensiones, pero namás les habituales nun proyectu d’estes característiques. En tou casu, agora mesmo, pasaes yá tres presentaciones del llibru, puedo dicir qu’esti proyectu unionos más como amigos. –V.M.: La ellaboración d’esti llibru, anque hubo problemes, foi casi una fiesta. –Ustedes dos son poetes, pero «Tripulantes» ye un llibru fundamentalmente de narrativa... –D.G.: Siempre digo que nun veo nada clares les llendes ente poesía y narrativa, sobre too cuando falamos de textos breves como los que componen esti llibru na so mayoría. Amás d’eso, Vinalia yera un fanzine de relatos curtios, y dao qu’esti llibru ye un homenaxe a esa dómina parecionos procedente que’l llibru namás axuntara relatos breves. Sicasí, quiero resaltar que nesti llibru ye perimportante la presencia de poetes. Poetes d’un nivel altísimu como Antonio Orihuela, Mercedes Cebrián, Roxana Popelka o José Luis Peixoto, y que toos ellos amosaron qu’amás de bonos poetes son unos inmensos narradores. –V.M.: David y yo somos tamién narradores, y movémonos indistintamente n’unu y otru xéneru. De fechu, les llendes entrambos son difusos y más na poesía narrativa, como ye la nuestra. Vinalia foi, amás, un fanzine de relatos, y quiximos ser fieles a esa estructura. Quiciabes lo próximo que faigamos sía una antoloxía poética. –En «Tripulantes» hai, amás de textos, fotografíes y dibuxos. ¿Cómo se complementen unos y otros? –D.G.: Yo creo qu’a la perfección. Nesi sen, tanto’l propiu editor, Nacho Escuín, como los diseñadores, especialmente Germán Ucar, fixeron un gran trabayu. Textos y imáxenes fusiónense ente sí. –V.M.: Siempre apostamos pola fusión de xéneros. Como dicía Hernán Migoya nuna entrevista reciente, nun venimos de talleres lliterarios, sinón del mundu del rock, del cómic, del cine independiente... «Tripulantes» ye un exemplu de mestizaxe, una gran fiesta pa la cultura soterránea y llibre del Estáu. –Nel llibru hai firmes abondo conocíes (Ricardo Menéndez Salmón, Hernán Migoya...) xunto a otres casi anónimes. ¿Nun tienen mieu de qu’unos autores tapen a otros? –D.G.: El qu’unes firmes sían más conocíes qu’otres beneficia, na mio opinión, a los autores más anónimos. Per un llau, permíteseyos «midise» con figures de calidá contrastada, como los autores que cites o como Ángel Petisme, Eva Vaz, Juan Vicente Piqueras, Sergi Puertas o Manuel Vilas; per otru, va facer que más llectores descubran valores como Lluis Pons Mora, David Mardaras, el propiu Nacho Escuín... –V.M.: Non. Equí nun hai capitanes nin contramaestres, como diz David, sinón namás una tripulación. Voces consagraes y inédites y hermanamientu de xentes. –Asturies tá mui presente nel llibru. Amás de qu’ún de los coordinadores ye d’equí, ente les firmes hai una importante nómina d’autores que viven y escriben n’Asturies. –D.G.: Y podía haber más, pero dalgunos de los escritores invitaos nun m’enviaron nengún textu. Creo que n’Asturies, nos caberos años y anque haiga delles capillines ciarraes d’escritores, tenemos una cantidá increíble de bonos escritores. El mio llabor, y el de Vicente, y la de cualquiera que de verdá ame la lliteratura, ye’l de dalos a conocer por tolos medios de los que dispongamos, nesti casu al traviés d’esti llibru. De toles maneres, hai escritores de prácticamente toa España. –V.M.: Asturies ye la mio segunda casa lliteraria pola mio relación con munchos escritores d’ellí. Eso, amás de la presencia nel llibru de David, faiga que la presencia d’asturianos sía importante, anque hai tamién escritores llioneses, madrileños, catalanes... –Un asturianu y un llionés coordinen un llibru con autores de tol Estáu que s’edita en Zaragoza. ¿Rompiose definitivamente’l centralismu cultural nel Estáu? –D.G.: Cualquier centralismu nun ye cultural. La cultura, sía escrita o audiovisual, tien que ser abierta, participativa y asimilativa. «Tripulantes» sigue esi camín. Interésanos la calidá, lo que podemos aprender de textos, ilustraciones y imáxenes, y non d’ónde vengan. –V.M.: Fai munchu tiempu que les editoriales independientes s’asitien lloñe de Madrid o Barcelona, y eso enriquez el panorama lliterariu del Estáu. «L’antoloxía nun ye un llibru ciarráu, sinón un proyectu múltiple, colectivu». «Interésanos la calidá de textos, fotos y ilustraciones, non d’ónde vengan». David González y Vicente Muñoz Poetes y coordinadores del llibru colectivu «Tripulantes» David González y Vicente Muñoz son, amás d’amigos y poetes, los coordinadores de «Tripulantes » (Eclipsados), un volume d’homenaxe al fanzine Vinalia Trippers nel que dellos autores participen con relatos, fotografíes y ilustraciones. Ente les firmes del llibru, destaca una abultada nómina d’autores que viven y creen n’Asturies, como Ricardo Menéndez Salmón, Jorge Ordaz, Roxana Popelka, José Cezón, Luis García, Mark Ostrowski, Pepa Pardo, Inés Toledo, Nacho Vegas y Carlos Rodríguez Brea. «“Tripulantes” supón una gran fiesta pa la cultura soterránea y llibre del Estáu»
No hay comentarios:
Publicar un comentario